ف5 من هاد شهر فبراير، الإتحاد الأوروبي 🇪🇺قرر يوقف عمليات استيراد المنتجات البترولية الروسية🇷🇺… الخام.. المازوط.. لصانص.. الزيوت.. أي لعبة مشتقة من النفط جايا من روسيا بحراً مابقاتش غاتدخل للتراب الأوربيي.. يعني كانتكلمو على نسبة 51٪ من الصادرات النفطية الروسية غادي تشيط..
هنا روسيا غادي تطيح على واحد الحيلة باش تسوق مسايلها و تتفادا الحظر الأوروبي..كلمة السر هنا هي: “سبتة المحتلة”…
روسيا غاتبدا تشارجي المنتجات النفطية ديالها فناقلات🚢 من نوع Aframax… هاد الناقلات المميز فيها أنها صغيرة وسريعة و كاتقدر تكسح الثلوج فالمياه المتجمدة حيث كاتنطلق من الموانئ النفطية المطلة على بحر البلطيق بحال ميناء بريموسك..
هاد ناقلات Aframax الصغيرة كاتضرب الضورا على أوروبا بسرعة و فظرف 10 أيام كاتوصل للمياه المقابلة لسبتة المحتلة، تما كاتلاقا ناقلة كبيرة ضخمة كا تسناها من نوع VLCC لي كاتوصل السعة ديالها ل 2 مليون برميل.. كاتكون الخزانات ديالها خاوية.. كايقربو الناقلتين من بعضياتهم.. وكايبداو فعملية نقل الشحنة من الصغيرة للكبيرة… وكايتطلب الأمر 3 ناقلات Aframax باش يعمرو خزانات الVLCC… ومن تما كاتنطلق هاد الناقلات الكبيرة تبيع لمن بغات بدون قيود لأن الحمولة ديالها ماشارجاتهاش قانونياً من الموانئ الروسية..
العملية كايديروها على بعد 12 ميل بحري قبالة المياه الإقليمية لسبتة المحتلة أي فالمياه الدولية.. يعني ممارسة ملتوية لكن قانونية ومكاتنتهكش القانون الدولي.. وكايستفدو أيضا من الوضع ديال سبتة المحتلة أنها سوق حرة… هادشي حول المنطقة لنقطة مهمة فتجارة النفط الدولية.. وهنا طبعا الحيتان الكبرى دياولنا ماغاديش يزݣلو الهوتة..
بحيث كايستغلو تواجد هاد الناقلات الروسية على بعد 22 كلم قبالة سواحلنا.. وكايشريو عندها المنتجات البترولية مباشرة فوسط المياه الدولية…. وهاد العملية كا تم عبر وسيط لي هو شركات لوجستية مقيدة فسبتة.. يعني مقيدة فمنطقة حرة… وبالتالي كايدخلو الشحنات لي شراو لميناء طنجة.. وكايوهمو إدارة الميناء أنهم جابوه من مناطق بعيدة بآلاف الكيلومترات…
الربح هنا فين كاين؟؟ كاين فالثمن باش كايشريوه من عند الناقلات الروسية بحيث كايكون طايح ب70٪ أقل من الثمن فالسوق الدولية.. وفالأوراق كايديرو السعر الدولي المحدد فسوق روتردام لي موالف المغرب يتقدى منها.. يعني كايجنيو أرباح خياااااااااالية فاقت كاع ديك الأرباح لي كانت قبل…
عملية احتيالية متكاملة الاركان بتواطئ من الكل..